Peiling Burgerlust

Alaaf lüj va Egelse.  Joa, uur mót effe um úch hin kiekke, um miech te zieë. Iech sjtón óp d’r Kirkberg en iech bin Prins Antwan (Horbach) d’r Ieésjte. Prins va d’r Kirkberg en noe och jeugdprins va Egelse.

Iech woeën híj same mit mieng tswei zjwesterkes, ‘t Elieke en ‘t Jeanet en natuurlik mit mieng auwesj, d’r Harry en ‘t Elies  Horbach-Boermans.

Iech sjrief híj get dinger die ich uuch wel vertelle doamit uur miech get beëter lieërt kinne. ’t Is ja óch nit ezoeë leuk went uur miech sjtraks doa boave óp d’r Prinsewaan ziet sjtoa en dan móot zage: “Zaag, wat inne sjunne Jeugdprins hant vier, sjaat dat v’r ‘m  nit get beëter kinne.”  Noe, da vang iech mar ins aa.  Sjun is dat iech in 2011 genau 11 jaor bin en óch nog óp der 11.11.11 prins bin. Dat is doch sjiek wa? 

Wat dón iech ezoe aldaag?  Iech gón giddere sjoeëldaag noa de Veldhof en krien doa les van der meester Jef Scholtes.  Noa sjoeël han iech noch tied vuur te foetballe, dat dón iech natuurlik bíj LHC en iech sjpIeël in ‘t D in de midde of mid-vuur, wie ’t graat oet kunt.  Doa kin iech óch de Groeëte Prins Barry I al va. Va LHC meen iech, natuurlik nit van ‘t D, den doa sjpieëlt dea al lang nit mieë in.  Supporter bin iech van der nujje landskampioen, den dat weëd PSV. Dat is nog nit alles, den va LHC  loop iech noa scouting. Doa han iech vöäl vrung en doa dunt vier lekker boete sjpieële en allerlei sjpeller.  Doa lieërt me noch ins ee knupke legge. Went iech d’r scouting-haosdook aaf dón, da kin iech direk durch noa de bure. Sinds óngeveer 1 joar bin iech lid va Tennis Combinatie Laura Eygelshoven, zaag maar d’r Tenniskloep va gen dörp. Die hant sjun nuj bane en verlichting.  Me kin doa noen al vanaf d’r jannewaar boete tennisse. Ech sjun um doa ins te goa kiekke, mesjiens dat uur miech doa al ing kieër óp de baan ziet.

Wat wool iech noe noch mieë vertelle…. Och ja, han iech óch dere? Joa,  graad wie mieng zjwestere han óch iech inne knién, deë va miech heesjt Trekkertje. Dat kunt umdat inne va mieng groeëtse hobby’s tractors zint. Die neumt me ja óch trekkers, sjnapt d’r ‘t? Deë hobby va die tractors kunt van mieng auwesj. Miene pap en mieng mam zint allebei boerekinger. En went iech bíj der opa en d’r Jos  op bezeuk bin, da darf iech aaf en tów op inne richtige trekker vare. Heem mót iech ’t da doeë mit mieng komplete verzamloeng Jonn Deer landbouwmachines. Went iech noen ins richtig hèl wil vare, da gón iech karte. Dat geet jóng, zoeë mit deë rónkende motor i-gen ruk en d’r wink in ‘t gezich.
Went iech noa inne lange daag da nog nit muj bin, dan leës iech nog get in Geronimo Stilton. Dat zint sjpannende avonture van ing moés durch de weltliteratoer. Went iech nit lees, kiek iech geër noa National Geographics of Discoverychannel. ’t Aller interessantse ving iech ummer went ze groeëte construties lotte zieë en programma’s wie “How it’s made”, iech bin neemliech erg technisch i-gesjteld.

Al die dinger hant vier bijenee gebrach in mieng Prinseorde. Kiekt mar ins híj óp de bladzijde, da kint uur ‘m  ins gód bekieke.

Mar wat hat zoe’ne vrundlige, sjpontane, sjportliege  jóng mit interesse vuur techniek en beuk noen óp mit vasteloavend viere, zalt uur dinke.

Dat is gans einfach. Zoeëlang iech kin dinke, gunt vier al mit de ganse familie noa ’t Socio Project. Soms mit mieë wie 20 man. Ze kómme uvveraal  vandaan. Oét Amsterdam en zoeë gaar oét Mastrich. En dan mar viere. En mit get geluk sjpieële ze dan mie lievelings leedje, d’r ‘super sjoone daag’ uvver de groeëte giraf en d’r sjterke tieger.

 Iech vrui miech al erg óp de vasteloavend. ’t Allersjiekste is dan es Jeugdprins Antwan I óp d’r Prinsewaan te sjtoa en klumpkes en e zoeë oetwerpe.  Dan zien iech nit alling mieng auwesj en prinsesse-zjwesterkes langs d’r óptsog sjtoa, mar üch allenui. En da roop iech Alaaf, zoeë hèl wie iech kin en werp da de lekkerste klumpkes uvver üch óet.

Ing  sjun vasteloavend wunsjt üch

D’r Prins va d’r Kirkberg

Antwan I
Jeugdprins va Egelse

                                   IS DE VASTELAOVEND NOG ZOEË LAAT

                                   IECH ANTWAN I STJÓN UMMER PARAAT

                                   KÓM IECH DA D’R KIRKBERG AAF

                                   REUPT GANS EGELSE ANTWAN ALAAF!