Nuije Prins va Egelse 2011-2012

Prins Machiel  d’r Ieësjte

Bleierhei, Bleierhei,  weë kint 't nit. En….. 't Is de plaatsj woa iech, gód da mit inne klinge umweg langs de vroedvrauwesjoeël, in 1987 geboare bin.  Doa woar 't woa iech de allerieëtsjte kieër de vastelaovend mit maket. D’r Kirkröätsjer tsóg koam langs mieng vuurduur.

Mieng mam hool miech doe op d'r erm en iech kokkelet. Dat klónk dóé al  wie Alaaf! Iech moeët lache wie iech al die klone langs ós duur zoog trekke. Dat had maar ee paar joar gedoeërd, doe zint vier noa de Bosse getrókke. Vlak bij de opsjtelplaatsj va de Groeëte Egelser Vasteloavend Tsóg mit oetblik op 't dörp zellever. Vanaaf 1993 waor 't indlieg ezoeë wied.  Vier koame in gen dörp woeëne. In d’r sjatte van d'r klokketoeër van de groeëte Kirk.

Wie iech ’t uvver  “vier” han, is ’t effe tied de res van de familie vuur te sjtelle.

Mienne pap en mieng mam dat zunt d’r Jos en ‘t Joan Kerres.  Iech han noch ee breurke en dat is d’r Martijn. Allemoal vasteloavendsvierdere in hats en neëre.

Iech bin noeëts inne jóng van aafwade gewea.  Wie iech neëver de Kirk koam woeëne, bin iech mesdener gewoeëde. Mieng vrundin, t Aukje va d'r Beunen is dat noe noch ummer. Mit dat Aukje bin iech noe al 8 joar tesame en vier zint, sjaad vuur al die vraulüj die wakker ligge van inne sjtaatse Prins, frisj  verloofd. 

Vuur dat iech Prins woeëd, han iech gestudeerd an de Hoëge Hotel sjoeël in Mástrich, doa woeën iech trouwens óch. Nit op die sjoel, mar in Mastrich. Sjrekt mar nit, mieng residenz han iech noch ummer in de Sint Janstroat.  Wie iech an ‘t sjtudere woar, han iech noch al get in d'r horeca en bij evenementeburo's gewirkt. Doa vóng iech óch mieng passioeën vuur d’r horeca. Dat sjoedere góng miech op ziech wal gód aaf, mót iech zage. Da kin natuurliech zieë dat dat bij ós in de familie ligkt. Es klinge jóng han iech neemlich nog les gehad va mieng oma óppen sjoeël. En nit alling in wiechtige dinger, mar óch in de ónwiegtige wiegtige dinger zoeë wie vasteloavend viere. Mieng eldere, die kinne d'r óch get va. Kiek, 't is ezoeë dat iech zelver al get langer dra hauw gedach um Prins te weëde. Mar ’t vurrig joar mit die daag, doe koame d'r pap en de mam an d'r kaal mit ee paar jónge va de Burgerlust. Mieng eldere wóste natuurlich al lang dat 't al ummer inne droom van miech jeweë woar eemoal Prins te zieë, in Egelse alaaf. En wie 't ziech ezoeë vuur dong, gans toevallig, doe han iech joa gezag.  Iech Machiel d'r Ieëtsje, bin Prins van 't Nuij Egelse. Os dörp sjteet  ezoeë gód d’r óp, um sjtoots d’r va te weëde.  Iech bin nit alling d’r ieësjte prins van t Nuj dörp, Iech han óch noch ins d’r elfde van de elfde in elf in mie regeringsjoar. Wat wil me noch mieë es Prins. 

Lüj hant miech al ins gevroagd, zaag Machiel wat dees doe egentlich wens doe nit graad Prins bis? Dat kin iech zage.  Iech wirk vöäl mit in ’t bedriéf va mieng eldere. “Kerres Transporten”.  Vier vare vrachte vuur vöäl versjillende bedriever en wirke doa mit inne ganse hoop lüj en waans aa.  Ós waans blieve ummer i deens.  Zoeë lupt al joare inne waan va ós  mit in d’r Groeëte Egelser Tsóg, vuur d’r Groep “Sjpriets Ellef”.  Den doa jón iech al get joare mit óp d’r Tsóg in Egelse én in Kirchroa. Wen Iech nit wirk, da sjport iech. Zoeë dón iech bijvuurbild a hockey en skieje.  En sommige lüj zage dat iech inne ‘Meister in der Jagd’ bin.  Zelver dink iech doa get angesj uvver. Iech bin wal ins in Wolfenbuudel  geweë en han doa e hert tussje de heure gepütsjt, mar umdat noe Meisterhaft te neume, dat weet iech nit ezoeë direk. Iech haud trouwens óch vöäl va water. Os familie geet neemlich geër zeile. ’t Is wirklik heerlik um ónger zoeng blauw hieëmel te tsóg te zieë.  Uvver tsóg gesproake. ’t Zou doch geweldig zieë went vier óp vasteloavendszóndig óch inne sjtrak blauwe hieëmel küete han wen vier mit d’r Tsóg oét trekke.  Doa vrui iech miech bezóngesj óp. Hoeëg boave van aaf miene Prinsewaan zien iech üch dan allenui langs d’r weg sjtoa. Vier rope ós da ee kreftig Egelse Alaaf tów en vruie óos tesame óp die sjun daag die nog vuur ós ligke.

Vier, Prins Machiel d’r Ieësjte va Egelse,  wunsje üch allenui ing ónvergeëtelikke vasteloavend, mit vöäl sjpas an de vruid.

Lijfspreuk van Prins Machiel I: D’r zin va ’t leave is d’r zin a geave!